काठमाडौं । सञ्चारकर्मबाट राजनीतिमा लागेका रवि लामिछानेले आगामी निर्वाचनमा झापा, डडेलधुरा, चितवानबाट चुनाव लड्न मन भएकाे बताएका छन् ।
आज राष्ट्रिय सभागृहमा आयोजित कार्यक्रममा बाेल्दै उनले यस्ताे भनेका हुन् । आफूलाई चुनाव लड्न नडराएको तर सरकारमा को छन् र उनीहरुले विगतमा गरेको चुनाव हेरेर आफू सचेत रहेको अनुमान गरेको लामिछानेले बताए ।
आज उनले नयाँ पार्टी समेत घोषणा गरेका छन् । आजबाट उनले विधिवत रुपमा राष्ट्रिय स्वतन्त्र पार्टी घोषणा गरेका छन् । चुनाव चिह्न भने घण्टी प्रस्ताव गरेकाे र पार्टी कार्यालय बसुन्धरामा रहने जानकारी दिए ।
राष्ट्रिय सभागृहमा भएको कार्यक्रममा उनले पार्टीका सदस्यहरुको सुझावका आधारमा सुझबुझका साथ उम्मेदवारी घोषणा गर्ने बताए ।प्रत्यक्ष निर्वाचित प्रधानमन्त्री र मुख्यमन्त्रीको व्यवस्था हुनुपर्ने अवधारणा राखेका उनले आफ्नो पार्टीमा परिवारवाद निषेध र युवा सहभागीता ५० रहने बताए । कार्यकर्ताविनाको पार्टी हुने भन्दै उनले पार्टीमा उम्मेदवार बन्न पहिले पार्टीभित्रबाट चुनिने व्यवस्था गरिने बताए । आफ्नो पार्टीबाट निर्वाचित भएकाहरुले राम्रो काम नगरेमा उनीहरुलाई फिर्ता बोलाइने पनि बताए ।
कार्यक्रमलाई सम्बोधन गर्दै लामिछानेले कुनै पनि व्यापारिक र व्यावसायिक घरानाबाट चन्दा संकलन नगर्ने घोषणासमेत गरेका छन् । पार्टीका सदस्यबाट उठ्ने रकमबाट पार्टी चलाउने उनले बताए । लामिछानेले व्यापारी व्यवसायीले ढुक्क भएर व्यापार गरेर सरकारलाई नियम अनुसार कर तिरे मात्र पुग्ने बताए ।
